GEERAAR: COLAAD TAAG UMA HAYNO. BY: MAXAMUUD IBRAHIM (XAAJI)
GEERAAR: COLAAD TAAG UMA HAYNO BY: Mohamoud Ibrahim (Xaaji)
Culaab baa is dul fuushoo
Tii horaa na cuslaysoo
Colaad taag uma haynoo
Cayn-na daaba warkeeda
Casiisoow naga baaji
Cirsanyeedhkii dhawaaqiyo
Kii cimaamada saariyo
Cuqdadloowga agjoogiyo
Inta ciilka sokeeye
Camaloo dhan ka doortay
Alloow cayn ka badbaadi.
Cuqdad yuururta koow dheh
Iyo caamada yaacda
Catir caano ku dhuuqe
Cumdahaa gurxamaaya
Waa calaamad suaale
Horta yaa calan saartay?
Cirrid yaambiyo foosto
Iyo coomirka joofle
Candhmeydliyo dhoobbi
Iyo caaglahan waashay
Yay cawaansanayaanoo
Cidda keenay horteeda?
Cumbush-caambushkan gaaban
Iyo Cawlkan hagaasay
Cubeydkaa isha qaydan
Iyo kooxdan cammuuda
Weli caasha ku haysa
Yaa ciqaamada siiyey?
Ilma ciije waraabe
Iyo ciiro-malluugan
Cali-Caaruf dirkiisa
Iyo cawradan waalan
Waa calaamad su’aale
Horta yaa cashar saaray?
Colka Faysal waraabiyo
Kuwii Caynaba aadee
Dabadeedna carraabee
Caynka hooska ka giijee
Citimaadka Hargeysa
Ku saxeexay ciyoonba
Caasiyiinta riddoobay
Cafis yaa horta siiyey?
Warbal caallahan qaaddan
Culuqaa ku lammaan iyo
Dadoow caaqan agtiisa
Siduu caano ka nuugi
Dhanna ciirsanba waayey
Ciqaab Eebbe miyaa?
Cirka roobka yareeyiyo
Cudurkii kal horeeto
Ku asiibay carruurta
Een cirroolaha dhaafinee
Carradoo dhan ku faafay
Inuu Caadilku keenay
Cilmi baa ku sagnaadee
Miyaynaan cibro qaadan?
Culaab baa is dul fuushoo
Tii horaa na cuslaysoo
Colaad taag uma haynoo
Cayn-na daaba warkeeda
Casiisoow naga baaji
dalmarbilaal@gmail.com
By: Mohamoud Ibrahim (Xaaji)