Guddoomiyaha Maxkamadda Racfaanka Gobolka Sanaag, Maxamed Axmed Cabdalle oo socdaal shaqo ku tagay degmadda Gar-adag ayaa sheegay inay soo gabogabeeyeen shan dacwadood oo ay ku dhegaysteen magaaladaasi, isla markaana rajaynayaan inay kuwo kalena bilaabaan inta aanay ku noqon magaalada Ceerigaabo ee xarunta Gobolka Sanaag.
Siduu ku soo warramay Weriye ka tirsan Wakaaladda Wararka Somaliland, waxa Guddoomiyaha Maxkamadda Racfaanka Gobolka Sanaag uu sheegay in aanay jirin wax cabasho ah oo ka tirsan Garsoorka degmadda Gar-adag, hase ahaatee Siyaasadda Guddida Caddaaladdu ay ku wajahan tahay in bulshada loo dhaweeyo Garsoorka, maadaama oo Ceerigaabo iyo Gar-adag isku jiraan 150km.
Waxa kaloo Guddoomiyaha Maxkamadda Racfaanka Gobolka Sanaag uu bulshada ku dhaqan degmada Ceel-afweyn ugu baaqay inay joojiyaan colaada oo dib u dhac u keenaysa wadajirkii ummadda isla markaana waxyeelo ku ah qaranimadda Somaliland. Waxaanu waxgaradka deegaanka Ceel-afweyn ku booriyey inay kaalin ka qaataan sidii loo soo afjari lahaa dirirta iyo shaqaaqooyinka aan loo baahnayn ee ku soo noqnoqday Degmada Ceel-afweyn. Waxaanu tilmaamay in xukuumad, madax-dhaqameed iyo waxgaradba dedaal weyn la geliyey sidii nabad looga dhex aslaaxin lahaa ardaayada walaalaha ee ku dhaqan Ceel Afweyn.