Fadhigii Maanta 27 Sep 2020 ee Golaha Wakiilada JSL oo uu shir gudoominayay Gudoomiye kuxigeenka 1aad ee Golaha Mudane Axmed-Yaasiin Sh. Cali Ayaanle ayaa qodob qodob ugu codeeyey Xeerka Doorashooyinka qaranka.
Xeerka ayaa qodobo dhawr ah wax lagaga bedelay oo ay ka mid yihiin.
1. Soo jeedintii madaxweynaha ee Kootada dumarka iyo dadka laga tirada badan yahay oo laga saaray
2. Da’da musharixiinta golayaasha deegaanka oo hore u ahaa 25 jir imikana laga dhigay 30 jir.
3. In da’da dadka codaynayaa ay ugu yaraato 15 sano jir.
4. Waxa wax laga bedelay lacagihii iyo hantida musharixiinta golayaasha dadka isu sharaxaya.
5. Waxa la laalay in habkii is xambaarka ee deegaano ka mida gobolada bariga lagaga soo bixi jiray oo la joojiyey meeshana laga saaray.
6. Waxa mar kale loo codeeyey oo lagu ansixiyey in saamiga kuraasida goboladu ahaadaan sidoodii hore
Sidoo kale waxa wax laga bedelay qodobo badan oo xeerka ku jira kuwaas oo goluhu u arkay inay wanaajinayaan qabsoomida doorasho waqtigeedii ku qabsoonta.
Gudoomiye Axmed-Yaasiin ayaa markii codayntu dhamaatay xeerkana la ansixiyey waxa uu ku dhawaaqay in goluhu galay fasixiisii caadiga ahaa oo noqon doona 45 maalmood