Makullaal, waa maanso cusub oo aanu weli qallalin khadkii lagu qoray, waxa qalinka laga qaaday 19.Maarij.2017, oo ku beegnayd maalmo kooban hortood. Waa maanso qayb ka ah silsiladdii Miimleyda ee waayadan xiisaha weyn u lahayd dhammaan dadka reer Soomaalilaand, waxaana hal-abuuray abwaan Mubaarik Yuusuf Cabdi (Geel-qaad). Iyada oo ka dab-qaadanaysa wakhtiga ay curatay iyo xaaladda ay ku soo baxday, Makullaal waxa ay indho miyir-qaba innagu daawadsiinaysaa waayaha naxdinta leh ee uu dalku maanta ku jiro, sida aan loo hayn cid u damqata iyo godadka ay ku sii wadaan kuwa talada haya ee aan u tudhayn dalka iyo dadka midnaba, isaga oo abwaanku ujeeddadiisa ku gud-binaya tusaaleyaal waaqiceenna ku sidkan. Intii akhrida ayaa murtideeda la bixi doontee, aan idiin kala baxo idinka iyo abwaanka.
Wuxuu yidhi:
Ka mafsuuday weedhiyo
Maansada hal-doorka ah
Maqalkeedu ii tebi
Toban maanka garashadu
Ka istaagay meel adag
Aniguna miciinsaday
Milgo darajalaydiyo
Maalmo taan ku duuliyo
Suugaanta maaxda ah
Iyo miidda jiiftada
Marka xiga salaan iyo
Muxubbiyo kalgacalkii
Hal-abuur midayn jiray
Anigoon madhxinahayn
Ka bilaabay midigtoo
Gobonnimo ku maamulay
Mishigaannadii furay
Muujiyay tixdaydana
Sidaan ahay maqiiqane
Maydal faras ku joogoo
Marriideeyay seeftiyo
Magligiyo billaawaha
Maydaanka soo galay
Oo miigganaantii
Maaweelo waa shile
Mitidnimo ku dhaarsaday
Saddexdaasi maamuus
Maydhaxdaan ka diiriyo
Murti weeye duur xula
Saddex kalana miisaan
Hal-muceedyo gaariyo
Mawjaddii abwaankiyo
Raggay maagtay weeyaan!
Majaraha qalloocdiyo
Talo iga maroortaan
Masalooyinkeedii
Mari saaka leeyee
Maraggeeda ii fura!
Barta maxastu taallaa
Meel abaara weeyee
Haddaan maagay guuraha
Inay guurto maatidu
Shaw midiidinkaygii
Madibaan ka joogaa
Kolkii ay maggawdee
Maandeeq hasheennii
Laga gooyay maraqana
Dhay macaan waxaan sugo
Illeen waa masiibee
Malaw xerada joogiyo
Masas baaba hoos galay
Waxaan yeeli mooyee
Iyagaa masruufsday
Goor xalay mirtii dhexe
Dadku miyir u seexdeen
Ka maleegtay jiifkoo
U maleegtay goobtuu
Caku madanahaygay
Mooryaantu dhaantiyo
Malafsiga nin door biday
Ka shir-qoolay maatida
Mugdigii habeennimo
Margi-balaqyadii iyo
Gebi mudanayaashii
Maqashiiyay heestoo
Marka hore odhaahdii
Muran waan ka daalee
Midhkan waano uga dhigay
Masuulkaa la doortoow
Sharaf sida mullaaxdii
Rabbi kugu mannaystiyo
Milgahaaga shaalkaa
Lama siisto maal iyo
Maggaabada hal weydiyo
Waxa dhuunta kuu mara!
Masuulkaa la doortoow
Mudnaantiyo karaamada
Cisi lagama maarmee
Haddaad gaadho meel sare
Magacaa la dhowrtaa
Isha milicsigeeduna
Manka saaran loollida
Adoo moogan laagyada
Malaggaaga oo galay
Muudso dhabaqa yey odhan
Is miidaamintaadana
Muuqaalku yuu hagin
Hibadaad mahiibtiyo
Shayga muunad kaa dhiga
Wax lagaaga maagiyo
Haka dhigin wax mina ah
Saddexdaasi maamuus
Maydhaxdaan ka diiriyo
Murti weeye duur xula
Saddex kalena miisaan
Hal muceedyo gaariyo
Mawjaddii abwaankiyo
Waa maayad duufaan !
Haddaan tixda maaddiyo
Ku marriimo sheekiyo
Hal ay muhatay laabtani
Midhkaan uga gol leeyahay
Macnaheedu waa kane
Masaladan u fiirsada
Waxay meehanawdiyo
Waxay maqasha laysaba
Waxay muska joogtiyo
Waxay dibada meertaba
Bisadii magaagnimo
Macaluul ku gabbatee
Markay dihatayay dhashay
Siddeed wada mataana ah
Oo midiba cayn yahay
Muruqeeda eegtee
Micideeda lisatee
Midkii curad u noqon laa
Inta ay majeeratay
Ka bilawday madaxee
Mijaheeda dubatee
Tidhi Alla macaanaa!
Iyo mudanaheennaa
Siduu yahay maxbuus dila
Ragannimo ka maydki’i
Maso weeye kaliyoo
Miliqsiguna waa kii!
Ujeeddada mucdeedana
Maldahaadu waa sire
Mashaqada ku guud furay
Mudanaha ku loofaray
Xilka madaxa loo sudhay
Innagaa mushkiladaha
Maqaarkooda sidannee
Mudduciga waxaan idhi
Goortuu maquurtee
Talo looga maarmee
La maax-dumiyo geesiga
Goortuu malmalashada
Indheer-garad mug wayn lihi
Xaajada murkacatiyo
Ka meeraysto dhiillada
Hal-door marti loo yahay
Magantiisa goortuu
Uga tagay munaafaqa
Alla magane sawtaa
Dadkii moofo loo shiday!
Alla magane sawtaa
Malabkaynu dhibcaayiyo
Ubixiyo magoolkii
Wax mahoobinaayiyo
Macaan-jecesha loo diray!
Alla magane sawtaa
Ceelkii millaalnaa
Murdiyaayda eedee
La miishmiishay laaskii!
Alla magana sawtaa
Guntu muuqanaysee
Moolkiisa niib adag
Masafyadu gilgilayaan!
Anoon sii mushaaxayn
Waxaan maansadaydiyo
Mareegtii ku soo xidhay
Adigoo u meel dayay
Misna talo mushaawiray
Markaad geeddi dheer tahay
Murti guunabaa tidhi
Maaraynta hawlaha
Mar dhow ratiga haw furin
Muraadkii nimuu yahay
Markabkaaga yuu rarin
Malkadaada yuu tagin
Midhna yaanu kuu tarin
Yuu intaada maamulin
Ama meherad kaa dhigan!
Wa billaahi towfiiq.
Soo gudbinta: Maxamed Sharma’arke